Panihapon hin Musika

Dida han Sabado, Hunyo 6, nagkita ak upod han ak sangkay nga hi J han pasundayag han Pacific Symphony Orchestra ha Renée and Henry Segerstrom Concert Hall. An pasundayag amo an Simfonia No. 9 ni Ludwig van Beethoven.

Han semana ugsa han pasundayag gasi ko nga diri ak makatambong kay waray na man baligya nga ticket. Kondi han mga pasado a las 5 han kulop tinawagan ak ni J nga mayda niya extra nga ticket hin tag $29 ngan nagpaki-ana hiya kon interesado ba ak. Siyempre interesado ak, labi na nga an Simfonia No. 9 ni Beethoven usa han akon mga paborito han mga ginkumposo ni Beethoven. Ngan diri la usa nga paborito, amo gihapon ini an akon naruyagan han tanan nga mga ginkumposo ni Beethoven. Larga ak dayon ngadto ha Costa Mesa--an naka-iha la amo an pagbiling hin phone charger ngan pagpagasolina. Pero nakalarga ak han mga 6:15 han kulop ngan diri man gud undang-undang an trapik, katapos hin pag-manejar han kotse nga namamati hin Espanyol nga CD, inmulpot ak ha Costa Mesa han mga 7:15 han gab-i. Ginparada ko an kotse didto ha mall, ha atbang han Claim Jumper ngan sinmulod ak han mall. Didto ginkakita ko hi J ngan nagpasyada anay kami ha mall kay a las 8 pa man an pasundayag. Han amon iruistorya, nagdesidir na la kami pagkadto han concert hall kay mayda namon papaki-anhan kon makapalit kami hin ticket ngadto han kan Beethoven Piano Concerto No. 5 nga igpapasundayag han sunod nga Sabado Hunyo 13. Dinmiritso kami, pero pagpaki-ana nam mayda hisgutan mahiunong han discount amo nga waray la anay kami pinmalit han ticket, pero hi J nagsaad nga maniningkamot hiya nga makakuha hin discount.

¿Ano man an ak masisiring han pasundayag? Baga hin panihapon hin Musika.

An syahan nga ginpasundayag amo an "Lux Aeterna" ni Morten Lauridsen. Ini in choral & organ nga piesa nga nagamit gihapon han orkestra. Ini nga piyesa nagamit han mga kabahin han "Requiem"--ha hini nga piyesa, an mga kabahin han "Requiem" nga gin-gamit amo an "Introitus", "In Te, Domine, Speravi", "O Nata Lux", "Veni, Sancte Spiritus", ngan "Agnus Dei".

An ikaduha nga kabahin han pasundayag amo an Simfonia No. 9 ni Beethoven. Bisan man kon nakabati na ak hini, makusog an epekto han musika la gihapon. Bisan kon usa ka oras an bug-os nga ginkumposo waray kasumhanan an musika. An tanan nga upat nga kiwa han simfonia maupay an pagpagawas. Kusog an orkestra ngan han choir. Katapos han pasundayag, tukdaw hi ako ngan an iba hin palakpak.

Gintapos an gab-i hin nagpatunog han pipe organ hin usa nga musiko. An iya gintokar usa nga pag-improvisar hin mga tema tikang kan Beethoven sugad han "Für Elise", syahan nga kiwa han Simfonia 5, usa nga bahin han Simfonia 7, ngan in kabahin han "An die Freude" nga am nabati-an anay dida han pagpsasundayag han Simfonia No. 9. Katapos hini gintokar niya in piyesa nga ginsurat ni Bach.

Katapos han pasundayag, binmaktas hi ako ngan hi J balik ngadto han mall, katapos nanguli ha amon tagsa sarakyan. Hi ako, inmuli, namati hin Espanyol nga CD, nanihapon ha In-n-Out bisan diri gutom, ngan katapos, inmuli. Mga pasado 12 na ak pag-ulpot ko ha balay

Maupay hin duro an pasundayag. Nasiring ako nga an gab-i baga hin Panihapon hin Musika. An "Lux Aeterna" amo an sinisiring nga aperetivo, entremés, antipasto, hors d'oeuvre, appetizer o panguna. An Simfonia No. 9 amo an kan-on ngan sura--an panihapon mismo. Ngan an urhe nga pagpatunog han organ amo an masisiring nga dessert.

Bulyaw Mariguen

Ini in banda nga nagpapatunog hin Cuyonon nga Binisaya nga musika. It ira websayt ada ha

http://bulyawmariguen.blogspot.com/

Igdudugang ko ini ha akon lista hin mga sumpay nga nahanunungod han Kabisay-an