Pagsaurog hin Tchaikovsky

Dida han kataposan nga adlaw han Agosto (31 han Agosto) kinmadto naliwat ak ha Hollywood Bowl agod magkita han ira sinisiring nga Tchaikovsky Spectacular.

Ini nga konsyerto nagpanguna hin musika nga ginkumposo han Ruso nga kompositor nga hi Pyotr Ilytch Tchaikovsky.

Adi ha ubos in video ha YouTube nga ginkuha hadto nga gab-i



Ginkuha ini nga video dida han mga harani na han kataposan han pagtokar han 1812 Overture ni Tchaikovsky. Waray kuhaa an bug-os nga pasundayag ha video.

Kahibalik han Kinatsila

Dida han lain nga blog ni Pepe Alas ha AlasFilipinas (an syahan nga Pilipinhon nga bitacora o blog ha Espanyol o Kinatsila) mayda hiya paskin mahitungod han panuyo ni Presidente Gloria Macapagal Arroyo nga igbalik hin pagka-opisyal nga yinaknan an Espanyol o Kinatsila nga yinaknan.

Ini nga sumat ginpahayag gihapon dida han Yahoo!España nga mga sumat ngan ha Latino.msn.com nga websayt.

(PALANAT: An Yahoo! España nga sumat ginkuha na han mga nagdudumara han Yahoo).

Para ha akon mayda pagkamaupay ini nga sumat. Tungod kay damo nga dokumento nga nahahanungod han kaagi ngan kasaysayan han Pilipinas nahasurat ha Kinatsila. Kinahanglan iton seryoso nga nag-aaram mahitungod hiton kaagi hit Pilipinas maghibaro hin Kinatsila agod mabasahan an mga orihinal nga dokumento. An mga syahan nga pagpurulongan o diksyunaryo han Winaray ginsurat ha Kinatsila ni Padre Mateo Sánchez. An syahan nga gramatika han Winaray nga yinaknan ginsurat ha Kinatsila ni Padre Domingo Ezguerra. (Ini nga barasahon mayda ak kopya ngan puno ini hin impormasyon mahitungod han kagamit han Winaray ha Leyte han siglo han mga tuig 1600).

It akon la unta, kon mahimo ini nga plano nga mahibalik an Kinatsila nga opisyal nga yinaknan, nga iton Winaray o Binisaya nga Lineyte-Samarnon tagaan gihapon hin opisyal nga status han gobyerno. Pati gihapon iton ngatan nga yinaknan han Pilipinas. Diri ak naruruyag nga iton yinaknan nga mayda opisyal nga status ha Pilipinas Iningles la ngan Tinag-alog (nga ginpipinasangil nga "Filipino") la. Maiha na ini nga huwaso ha Leyte ngan Samar nga an aton kalugaringon nga Winaray diri gintutudo hin pormal ha mga iskwelahan naton. Iton aton kalugaringon yinaknan iton angay mangulo hit aton kalugaringon nga tuna. Ngan ha Sinirangan nga Kabisay-an, an mga kalugaringon nga yinaknan han katawhan amo an Winaray, Sinugboanon, ngan Inabaknon. Diri Iningles, diri Kinatsila, diri Tinag-alog.

Bulan hin Yama-yama

Hi Pepe Alas mayda paskin ha Skirmisher.org mahitungod han Bulan han Nasodnon nga Yinaknan. Diri ako na-uyon o natuo hit ngatanan nga iya ginsusurat pero maupay gihapon ini basahon.

Angay ko igpahayag anay nga naduda ak hin duro hiton kan Pepe Alas istorya mahitungod han sinisiring nga abakada ha Tinag-alog nga yinaknan. Mayda ginpapakita ha kasaysayan nga an abakada ha Tinag-alog nagtikang han kan José Rizal ensayo ha La Solidaridad nga "Sobre La Nueva Ortografía de la lengua Tagalo" nga ginmantala dida han Abril 15, 1890. Ngan naduda gihapon ako hit kan Pepe pagrason hit pagkaada hit Taglish ngan pagsagol hit Iningles han iba nga mga yinaknan han Pilipinas.

Pero maupay basahon it kan Pepe Alas kritiko mahitungod han siday nga Sa Akin mga Kababata (Ha Akon mga Igkasibata) nga sinurat kunuhay ni José Rizal. Ini iton rason nga ginrerekomenda ko ini nga barasahon.

Tagalismo ni Lopez ginbaton

Nabati-an ko nga dida han Martes, hi Representante Jaime Lopez han Ikaduha nga Distrito han Syudad han Manila naghatag hin pagyakan dida han Kamara han Representante mahitungod han butang han sinisiring nga wikang pambansa o nasodnon nga yinaknan. Agod matagan hin enfasis an iya punto, an iya igyarakan iya anay ginhatag ha "Filipino" (Tinag-alog udog). Pero waray la mag-iha, ginbaton hiya hin Sinugboanon nga Binisaya han mga Bisaya nga kongresista nga gin-unahan ni Representante Pedro Romualdo han Camiguin.

An mga panhitabo ginsumat dida han websayt han Manila Bulletin pero waray ko matad-an ini nga barasahon. Bisan pa, mayda cached nga bersyon han Google han mga panhitabo ngan dida ko nakuha an istorya han nahitabo.

Sumala han notisya, 30 ka minuto an debate. Dinhe, an mga Bisaya nga mga kongresista nagbaton kan Lopez hin Sinugboanon nga Binisaya. Tungod kay hi Lopez nag-Tinag-alog, nagBinisaya an mga kongresista nga mga Bisaya. Katapos hin 30 ka minuto, hinmadong hi Lopez han iya pagTinag-alog ngan nagIningles lugod. Kay an nagbubuot nga opisyal o presiding officer nagmando nga hi Lopez puyde "magFilipino" (magTinag-alog udog) pero kinahanglan an kahubad ngadto ha Iningles diretsohon katapos. Hi Lopez abitapa waray maruyag hini ngan gindiritso na la niya hin pag-Iningles.

Balik han aton istorya, maupay an mga Sugboanon nga mga Bisaya nga inmato hira hini nga sinalbahis nga imperialsmo. Maupay unta kon diri la an mga Sugboanon kundi an iba nga mga Bisaya sugad han Ilonggo ngan Waray binmulig pagpatok hini nga pakasulay nga Tagalismo. Maupay unta kon an mga Bikolano, Ilokano, Kapampangan, Pangasinense ngbp. nagyakan hin kasina hini nga binu-ang nga pakasmok han mga Tagalista. Amo an ak nahiubsan han istorya--nga an iba nga mga kanasoran han aton kapuropod-an ginpabay-an la nira an mga Sugboanon nga mag-usaan hin pag-ato hini nga linurong. Salbahis na la it mga imperialista tikang ha Manila, pero mas makapupungot pa ha akon nga gintutugutan la naton hira nga magbinuot ha aton. Ngan ¿nakain na ba an mga Waraynon nga kongresista? ¿Inmugop ba hira kan Lopez o inmugop ba hira han ira kalugaringon nga Winaray ngan han mga yinaknan han mga iba nga diri-Tag-alog? Waray notisya. Baga hin nagkawagra inin aton mga sinisiring nga 'representante'. Ngan nasiring hira nga mag-isog daw kita nga mga Waray.

Independismo ngan Secesionismo ha Eskosya

Nabasahan ko ini nga notisya ha Secession nga yahoogroup nga websayt. Sumala hini nga paskin, ginmantala na han Gobyerno han Eskosya (o Scotland) in barasahon han ira propuesto hin independiente nga Eskosya. Mayda nira websayt mahitungod han ira propuesto nga diin an mga taga-Eskosya puyde maghatag hit ira opinyon mahitungod hini nga ideya. Para han mga naruyag bumasa han ira propuesto o kondi man karuyag makakuha hin PDF nga kopya han ira barasahon pakadi hini nga sumpay.

Maupay an barasahon. Diri pa ako tapos pero ha akon syahan nga pagsubay, baga hin detalyado hin duro it propuesto ngan maupay an kahimo han argumento.

Pakakita kan Sarah Chang

Binmalik ak ha Hollywood Bowl dida han Huwebes Hulyo 26. An ak panuyo pamalit hin mga ticket para han Agosto 3 nga South Pacific nga pasundayag nira Reba McEntire. Tikang ha trabaho dinmiretso ak nga nagbiyahe tipangadto. Inmagi la ak hin pagpagasolina nga pagpalit hin dali-dali nga panihapon pero diritso ak nga nagmaneho han ak auto tikadto ha Los Angeles. Tungod kay diri ak karuyag nga pumarada didto nga tag $13 an bayad, kinmadto ak ha Los Angeles Zoo ha may Griffith Park nga dapit ngan ginparada ko an ak auto didto. Katapos sinmakay ak han shuttle para ha Hollywood Bowl (an pasahe $3 nga roundtrip o ngadto-balik nga biyahe).

Pagkadto, kahalaba an pila han mga namamalit hin ticket. Igo la ak nakapalit hin ticket para hadto nga gab-i ngan an 4 nga ticket para han Agosto 3 nga pasundayag. Dali ak ngadto ha igbaw pero yana tungod kay usa la ak, waray ak mamroblema hin pamiling hin lingkoran. An gintokar hadto nga gab-i amo an Academic Festival Overture ni Johannes Brahms, an Violin Concerto No. 1 ha G minor. Op. 26 ni Max Bruch ngan katapos han intermission, an kan Robert Schumann Symphony No. 3 ha E-flat major. Op. 97 ("Rhenish"). Ha hini nga tulo, an kan Bruch concerto an nagpanguna han Koreano-nga-Amerikano nga violinista nga hi Sarah Chang. Kay hi Sarah Chang an nagtokar han violin para han Violin Concerto ni Bruch.

Amo adto an syahan ko nga pakabati kan Sarah Chang. An iya sul-ot nga bado rosada (pink) nga mayda verde dida han saya. Makarit hin duro nga natokar hin violin. Katapos han konsyerto dali ak nga linmusad agod diri ak mabaya-an han shuttle. Pero pag-agi ko han Virgin MegaStore nga stand, mayda ko nakit-an nga mga CD ni Sarah Chang ngan mayda notisya nga hi Sarah Chang makada pamirma katapos han konsyerto. Dali ak nga pinmalit hin CD ngan naglinya ak para mapirmahan an ak CD ni Sarah. Tungod kay damo an mga tawo waray ak makalitrato hin maupay kan Sarah (ngan usa pa an mga nagpila waray tuguta nga maglitrato--an mga nagkikita la an mga nanlilitrato). Syahan ko adto nga pakatagamtam hin paglinya ngan pagpapirma hin artista amo nga haros baga hin malaksi ha akon an mga panhinabo. Madagmit hin duro, igo la ak nga nakahatag ak kan Sarah han iya pirmahan ngan nakapasalamat ha iya. (Hi Sarah Chang, naghiyom ngan nagpasalamat liwat ha tagsa nga dinmaop ha iya pagpapirma--artista gud man). Pero bisan man kon kapos hin oras, nakanotisya ak nga ha harani nga pagkita, mahuruhusay pa hi Sarah kaysa kon kitaon hiya tikang ha hirayo o dida han mga litrato niya.

Katapos hadto, kinmadto ak han shuttle para bumalik ha L.A. Zoo ngan balik han ak auto. Inmabot ak ha L.A. Zoo mga pasado a las 10. Tungod kay gab-i na hawan an mga kakarsadahan han ak pag-drive tipa-uli. Mga a las 11 y media na an oras pag-abot ko ha balay.

Gab-i hin John Williams

Ini nga paskin angay ko unta gin-una kay nahinabo ini han Hulyo 13. Kondi kay nakapaskin naman ak mahitungod han ak pagkita han Sleeping Beauty ni Tchaikovsky, sige na la.

Dida han Hulyo 13 nagkita ak upod hin mga kasangkayan han konsyerto ni John Williams ha Hollywood Bowl. Hi John Williams amo an kompositor hin musika/soundtrack hin kadadamo nga mga pelikula sugad han Star Wars nga mga trilogy, Indiana Jones nga trilogy, Jurassic Park, Superman, Jaws, Harry Potter nga mga salida, E.T., Hook, Schindler's List, Saving Private Ryan, Catch Me If You Can, Home Alone, Seven Years in Tibet ngan damo pa nga iba. An konsyerto nagpasundayag hin musika ni John Williams. Hi John Williams mismo didto--hiya mismo an nagkonduk han orkestra.

Nagkaburublag anay kami nga nangadto kay tungod han am pagdali ngadto han am mga lingkoran, pero pagkatapos han intermission, nagkasarapit kami (haros).

An syahan nga bahin han konsyerto nagpasundayag hin musika tikang hin mga salida nga nag-impluwensya kan John Willams. An gintokar, musika han Parade of the Charioteers dida han Ben-Hur, an marcha tikang han 1938 nga pelikula Robin Hood, "Scene d'Amour" tikang han Vertigo, musika tikang han Gone With the Wind ngan an tema tikang han Now, Voyager. An kataposan nga mga pyesa nga gintokar ugsa han intermission amo in pipira musika tikang han Dr. Zhivago ngan Lawrence of Arabia, ngan han pagtokar hini ginpakita liwat dida han mga screen in mga eksena tikang han hini nga mga salida. (Upod han instrumental nga musika han Dr. Zhivago an musika nga sinisiring nga Lara's Theme o Somewhere My Love).

An ikaduha nga bahin han konsyerto nagpasundayag han musika nga ginkomposo mismo ni Williams. An syahan nga gintokar amo anay in duha nga pyesa tikang han salida nga Superman an marcha ngan an Love Theme. Ginsunod ini hin tulo nga piyesa tikang han Catch Me If You Can. An nagsunod tulo nga pyesa tikang han Harry Potter ngan an musika tikang han Harry Potter ginpakita gihapon in mga eksena tikang han mga salida. An kataposan nga musika dida han programa amo an Throne Room ngan End Credits tikang han Star Wars:A New Hope.

Tungod kay makusog an mga palakpak han katapos, nagkaada hin maka-upat nga encore. An syahan nga encore amo an Imperial March tikang han Star Wars:The Empire Strikes Back. Sunod in musika tikang han Memoirs of a Geisha. Gintokar gihapon an musika tikang han E.T. ngan an kataposan nga encore an Raiders March tikang han Raiders of the Lost Ark.

Dida han pagtokar han Star Wars nga mga musika, damolaay nga mga magkirita nga nanguha han ira mga lightsaber ngan ira ini ginpasiga ngan ginpangalsa. Ginrekord ko liwat in pira nga mga bahin han konsyerto pero diri mga bug-os amo nga waray ko ini ginkarga dinhe nga blog.

Maupay hin duro an konsyerto. Kon bumalik pa hi John Williams pagkonduk hin konsyerto hit iya musika, magkikita gud ak.

Syahan nga pagkita hin ballet ha entablado

Nagkita ak han naglabay nga Sabado han The Sleeping Beauty nga ballet ni Pyotr Ilytch Tchaikovsky. Syahan ko nga pakakita hin ballet amo nga haros ngatanan bag-o. Ugsa hini, an ak nakit-an nga ballet dida pa la ha TV, an The Nutcracker nga ginkomposo gihapon ni Tchaikovsky. Pero maupay hin duro an pasundayag. Nakilala ko in pipira nga bahin han musika kay mayda musika tikang hini nga ballet nga gin-gamit dida han Disney nga salida nga Sleeping Beauty ngan dida han episodio nga Mice Follies han daan nga Tom and Jerry nga mga cartoon.

An ak la baga hin nadiri-an kay an ak nakuha nga lingkoran diri nakakita han bug-os nga entablado. Kay an ak napalit nga ticket an mga tag $25.00 la nga lingkoran. Mayda mga bahin han eksena nga waray gud ak makaklaro hin paglantaw sugad dida na han pag-ulpot han prinsipe ngadto han higdaan han Prinsesa ngan pagsangpit ha iya. Kay dida han entablado mayda mga parte han bungbung nga nakasalipod hin gamay han entablado han mga magkirita nga nanlilingkod ha ligid han auditorium. Pero bisan pa hini, naupayan gihap ak han pasundayag.

Kulup hin Zarzuela 3

Han akon kataposan nga paskin, nagsumat ako mahitungod han lecture ugsa han sarswela. Ini in ika-3 nga paskin ko mahitungod han akon kulop hin zarzuela.

Katapos han lecture, nangadto an mga nananambong ngadto han ira mga lingkoran. An akon lingkoran didto han ika-4 nga handana amo nga sinmaka ak hin duha pa ka hagdan ngadto ha igbaw.

Dida han nagpakalingkod na an ngatanan, sakto la nga a las 2 na an oras. Tikang dayon en punto an pasundayag. Nagsenyal an orkestra pinaagi hin pagtukar hin usa nga halaba nga nota. Katapos hini nga senyal, mayda anay kamingaw hin pira la ka segundo, katapos tikang na an sarswela.

Para han mga diri maaram han istorya han Luisa Fernanda, an istorya amo ini. An mga panhinabo hini dida han ika-19 nga siglo han panahon han pagreyna ni Reyna Isabel II han Espanya nga diin nagkaada hin rebolusyon nga nagpa-iwas kan Isabel tikang han iya trono. An sentro han istorya amo in usa nga triangulo hin gugma (love triangle) nga diin an mga api amo hira Luisa Fernanda, usa nga anak hin pensyonero ngan amo an eponimo nga karakter han sarswela, an iya uyab nga hi Javier Moreno, usa nga palikero nga sundalo ngan hi Vidal Hernando, usa nga hasendero nga nahigugma kan Luisa Fernanda. An syahan nga mga bahin han istorya nahinabo didto ha Madrid pero an kataposan han istorya didto ha Extremadura ha hacienda ni Vidal. An istorya mahitungod han pagkabangga han gugma hini nga tulo: hi Vidal buotan nga hacendero nga nahigugma kan Luisa Fernanda pero hi Luisa nahigugma kan Javier. Mayda gihapon dinhe intriga nga naglakip han politika han panahon sugad han pagkaaway han mga monarkista ngan mga republikano. Upod ini an intriga han usa nga dukesa nga hi Duquesa (Dukesa) Carolina nangestrupo kan Javier nga magin monarkista samtang hi Vidal, tungod la kay hi Javier nagin-monarkista, inmapi hiya han mga rebolusyonaryo agod madaog an kasingkasing ni Luisa. Damo it burubalhin hin mga inogop tungod han triangulo hin gugma. Sugad hin usa nga eksena nga diin gin-insulto hi Javier ni Vidal.

An kataposan han sarswela nahinabo dida han hacienda ni Vidal nga diin nag-aandam na hira han kasal nira Vidal ngan Luisa. Hi Luisa nahigugma pa kan Javier pero napakasal kan Vidal tungod han buhat ni Vidal para ha iya. Hi Javier inmulpot ngan ginsumatan hiya ni Luisa nga mapakasal hiya kan Vidal kay tungod amo man an iya obligasyon. Hi Vidal, nakasabot nga hi Luisa nahigugma pa gihapon kan Javier ngan waray na niya padayona an pagpakasal kundi iya ginbuhi-an hi Luisa tikang han iya obligasyon ngan gintugotan nga umupod kan Javier.

Para ha akon, maupay an kahimo han istorya han mga librettista hira Federico Romero ngan Guillermo Fernández Shaw ngan han pag-angay han musika ni Federico Moreno Torroba. Inmangay an musika ngan an istorya, an triangulo hin gugma ngan an politikal nga kaagi. Ginklaro ni Moreno Torroba nga hi Vidal amo an maupay an batasan, pero hi Luisa nahigugma pa gihapon kan Javier bisan man kon ini usa nga palikero. Baga an magkirita ginpapapili ni Moreno Torroba kon hin-o ba an angay pili-on ni Luisa. Ha ngaran pa la, ginpakita ni Moreno Torroba nga hi Vidal amo an mauruupay nga tawo nga maangay kan Luisa--an kan Vidal apelyido Hernando ngan hi Luisa an iya apelyido Fernanda ngan ha Kinatsila hiton Hernando ngan Fernando magkalain la nga bersyon han amo la gihapon nga ngaran samtang an Fernanda ngan Hernanda amo an binabaye nga bersyon hini nga ngaran. Pero an usa nga batasan ni Luisa Fernanda an iya waray pagkondisyon nga paghigugma kan Javier bisan man kon hi Javier diri naangay ha iya--hi Javier palikero, inmapi han mga monarkista agod sumaka hin ranggo ngan nagpa-estrupo hiya han Dukesa Carolina. Iton emosyonal nga tawo posible nga makatuok dida han kataposan nga eksena nga diin ginbuhi-an ni Vidal hi Luisa nga sumunod kan Javier.

Gawas han istorya, nakanotisya ak nga an mga prop ngan staging han sarswela simple la pero naangay. An entablado diri gud damo an dekorasyon, pero igo la an mga prop. An ira pagpakita han Madrid nga eksena ginbuhat pinaagi hin modelo han Madrid dida han entablado nga gamay dida han tuo han entablado samtang an mga aktor/magkaranta nakasul-ot han ira mga panapton--pero waray mga pinintar nga mga litrato dida han bungbong ha luyo han entablado. Mayda la damo nga lingkoran, ngan hin eksena nga diin gin-estrupo ni Dukesa Carolina hi Javier mayda hataas nga plataporma nga may ramp, pero gawas han mga dara han karakter, waray gud damo nga mga prop. Pagbalhin han eksena ngadto ha Extremadura, gintabunan la an modelo han Madrid ngan mayda usa nga kahoy dida han butnga han entablado, ngan mga lingkoran pero amo gihapon ka simple an mga prop.

Ha igbaw han entablado, dida han bungbung nga ubos han atop, mayda mga supertitle nga diin ira ginpapakita an Iningles nga kahubad han ginyayayan o ginkakanta nga Kinatsila. Amo nga kon mayda waray makatipara han Kinatsila, an Iningles nga supertitle nakabulig. (Nagplite ak liwat hin binoculars agod mauruupay an ak pagkita pero diri man gud ini kinahanglan hin duro).

¿Ano man it ak masisiring han mga magkaranta? Hi Domingo maupay pamati-on--an iya pagdara han papel ni Vidal Hernando kanan maestro gud man. Pero diri unta ak angay mahiusa hini--an mga kag-anak ni Domingo nagkakilala ngan nagkaasawa tungod kay mga magkaranta hira han kompanyiya nga nagpapasundayag para kan Federico Moreno Torroba, an nagsurat han Luisa Fernanda. Hi Domingo nagtubô samtang an iya mga kag-anak nagpapasundayag han mga zarzuela ni Moreno Torroba. Ngan hi Domingo nagtikang han iya karera pinaagi han zarzuela. Ini nga pasundayag para ha iya, baga hin iya pag-uli ngadto han iya gintikangan. An iba nga mga magkaranta mag-upay gihapon. It akon la diri maaram kon ano daw an kadara ni Maria José Montiel han papel ni Luisa Fernanda kay dinhe nga pasundayag, diri hiya amo an nagdara kundi usa la nga nagsaliwan nga hi Yali-Mari Williams. Maupay an kadara ni Williams, pero maupay unta kon nakakita ak kan Maria José Montiel kay hiya man an una nga ginplano nga madara han papel ni Luisa Fernanda.

Ginkumpara ko ini nga zarzuela han Winaray nga sarswela nga Kinasingkasing (an syahan nga sarswela nga akon nakit-an). Waray ak iba nga maikukumpara kay gawas han Kinasingkasing ngan Luisa Fernanda, waray pa ak makakita hin lain nga zarzuela. Nakaduha ak makakita han sarswela nga Kinasingkasing nga ginpasundayag han grupo nga An Balangaw, an kataposan ko nga pakakita hini dida han pira na la ka bulan ugsa ak nahipalangyaw, mga 10 ka tuig hadto. Ha akon pagkumpara, bisan man kon mag-iba an Kinatsila nga zarzuela nga Luisa Fernanda ngan an Winaray nga sarswela nga Kinasingkasing, mayda pagkapareho nga elemento. Syahan, an ka-simple nga ka arreglo han entablado ngan pagkasimple han mga prop. Ikaduha, mayda ini nga duha mga ginyayakan nga dialogo ngan musika. Ikatulo, mayda mga elemento han musika han hini nga mga sarswela nga nagamit hin mga sikat nga tunog. Dida han Kinasingkasing, mayda mga eksena nga ginmamit hira han tunog han kanta nga Quién Será ni Pablo Beltran Ruíz ngan han Bido-bido-bido han APO Hiking Society (pero iba an mga laray)--ngan an kataposan hini sinmayaw han kuracha ngan an mga nananambong nakaapi. Dida han Luisa Fernanda, an usa nga tunog han habanera dida baga hin mayda pagkaparehas han habanera han opera nga Carmen ni Georges Bizet ngan--sumala han naghatag han lektura--ginmamit daw hin usa nga eksena han tema ni Scarpia tikang han Tosca ni Giacomo Puccini. Mayda gud man pagka-iba, sugad han paggamit han orkestra dida han Luisa Fernanda, samtang dida han Kinasingkasing, waray ak makahinumdom kon mayda orkestra adton--pamati ko usa la nga nasista an nagtotokar o kundi man mayda mga ginrekord nga daan nga background nga musika. Pero ha mga basiko nga elemento, makikita gud an pagkaparehas han Espanyol nga zarzuela ngan han Winaray nga sarswela--diri urusahon kon an Winaray nga sarswela, amo an pagWinaray han nagtikang nga Espanyol nga zarzuela.

Hinaot unta nga makakita pa ak hin dugang nga mga zarzuela ngan mahibalik an pagkamasurong han Waraynon nga sarswela.

Kulup hin Zarzuela 2

Han kataposan ko nga paskin, ginsumat ko nga mayda lecture anay ugsa han sarswela. Ini nga lecture ginbuhat dida han lobby han ikaduha nga handana han Dorothy Chandler Pavilion. Mayda pa mga dugang nga akon karuyag igsurat amo nga nagtikang ak hin bag-o nga paskin.

Dida han lecture nga ginhatag hin usa nga api han orkestra (hiya usa nga api han orkestra nga makarit gihapon magpiano) ginsubay an kaagi han sarswela, impormasyon mahitungod kan Federico Moreno Torroba nga amo an nagkumpuso han Luisa Fernanda (an sarswela nga amon ginkikita) ngan an istorya han Luisa Fernanda. Damo han impormasyon nga iya ginpresenta nahasurat na nga daan dida han programa nga amon nakuha han pagsulod ha Dorothy Chandler Pavillion, pero nagdugang hiya hin mga gudti-gudti nga impormasyon nga nakahatag hin dugang nga mga detalye. (Nahiusa ak han iya siring nga an baritone ha Espanyol nga zarzuela amo an prominente, nga usa ini han pagkaiba han kasahiran nga opera nga diin an tenor amo an prominente nga magkaranta).

Upod dida han lecture an istorya han Luisa Fernanda. Dinhe, an nagpapahayag naghatag hin mga angay namon bantayan dida han tiarabot nga pasundayag. Pananglitan, mayda bahin nga diin an musika kanan habanera nga baga hin maypagkaparehas han Habanera dida han opera nga Carmen ni Georges Bizet. Siring gihapon niya nga angay bantayan an musika nga gin-gagamit han tagsa karakter dida han sarswela. Paghatag hiya hin mga pananglitan, iya ini gintutukar dida han piano nga dida gihapon han entablado.

Mayda niya gintokar nga upat nga nota nga siring daw tikang han tema ni Scarpia dida han opera nga Tosca ni Giacomo Puccini, pero kay waray pa man ak makakita hin pasundayag han Tosca, syahan ko pa la nga pakabati hini nga tema daw ni Scarpia--an ak nabati-an pa la nga bahin han Tosca amo an mga ginkanta nga mga aria tikang hini nga opera nga amo an mga aria nga Recondita armonia ngan E lucevan le stelle. Ini nga mga aria nasikat tungod kay ha mga konsyerto hin mga tenor ngan ha mga plaka, cassette ngan CD hin mga sikat nga mga tenor amo man ini an pinanganta. Pero iba na liwat ini nga istorya.

Natapos an lecture han mga 1:40 han kulop. Nagtikang an sarswela han mga 2 han kulop en punto.

Kulup hin Zarzuela

Yana nga adlaw, han ika-9 han Hunyo, kanina nga adlaw, kinmadto ak ha Dorothy Chandler Pavilion ha Los Angeles agod magkita han zarzuela nga Luisa Fernanda. Ginpasundayag ini nga zarzuela kanina han mga a las 2 han kulop. Mga duha ka oras an pasundayag. Ngan ini nga zarzuela, igpapasundayag gihapon dida hit Hunyo 10, Hunyo 12, Hunyo 14, ngan Hunyo 16.

Mayda ak mga rason nga magkita hini nga zarzuela. An syahan nga rason ko, kay hi Plácido Domingo, usa han mga nakanta dinhe nga pasundayag ngan usa man liwat ak han mga fan ni Plácido. An ak ikaduha nga rason amo nga karuyag ak makakita hin Espanyol nga zarzuela. Karuyag ak makakita hin Espanyol nga zarzuela kay ini, usa han mga paagi hin pasundayag nga nasikat diri la ha Espanya ngahaw kondi pati gihapon ha mga lugar nga ginkolonisar hini nga nasod sugad han Pilipinas. Tungod han kasikat han zarzuela, ini nagin usa han mga paagi hin pagpasundayag ha Waraynon nga kultura. Ha Winaray nga yinaknan, it pulong nga zarzuela puyde gihapon igsurat nga sarswela. Kadam-an han mga manunurat ha Winaray sugad kanda Iluminado Lucente ngan Norberto Romuáldez, Sr. nanurat hin mga zarzuela. Hi Romuáldez na la, an iya syahan nga kilalado nga sinurat ha Winaray nga yinaknan amo in usa nga sarswela nga an titulo An Pagtabang ni San Miguel. An akon panuyo han pagkita han Luisa Fernanda, amo an pagkuha hin ideya kon ano gud an Espanyol nga zarzuela agod makakuha ak hin ideya han hini nga forma nga gin-angkon ha Waraynon nga kultura nga sarswela.

¿Ano man iton zarzuela?

Sumala han programa nga akon nakuha, an zarzuela nagtikang han panahon ni Hadi Felipe IV han Espanya. Hi Hadi Felipe naruruyag hin pagpali-aw ha entablado nga diin, upod han yakan nga dialogo, mayda mga karantahay ngan musika. Kon diri hira nakakagawas hin pamiling hin kahayopan nga pamumusilon o pamana-on, mayda nira pasundayag dida ha palasyo. Tungod kay an palasyo ni Felipe ginpalibutan hin mga kabanwa-an hin tunok nga an tawag ha Kinatsila nga yinaknan zarza, dinhe nagtikang an ngaran kuno han zarzuela. An zarzuela (o sarswela) nagin sikat nga paagi hin pagpali-aw nga gindara han mga Espanyol ngadto han mga lugar nga ira ginkolonisar. Ha kaagi han zarzuela, damo nga impluwensya tikang ha iba nga kultura, amo gihapon nga nasiring hira nga it zarzuela, salakot hin mga dirudilain nga mga elemento.

Balik ngadto han pasundayag kanina, gasi ko diri ak makakita hini kay tungod han kasikat ni Domingo, posible nga waray na baligya nga ticket. Pero kanina han aga han pagtawag ko mayda pa man ngay-an mga ticket nga baligya amo nga nakapalit ak hin $68 nga ticket ngan nakakita ak han Luisa Fernanda.

Tungod han trafik ha Los Angeles nag-andam na la ak hin mga 2 ka oras nga reserba amo nga inmulpot ak didto han mga a las 12 han udto. Kinuha ko an ak ticket ngan burubaktas la anay ak katapos hin paniudto. Tinmabok ak ngadto han Walt Disney Concert Hall agod mangita la didto han tindahan hini. Han mga 12:40 binmalik ak ngadto ha Dorothy Chandler Pavillion agod makatambong ak han lecture nga gin-schedule han a la 1 han kulop ugsa han pagpasundayag han zarzuela.

Hilig han Lupin III

Dida han naglabay nga semana, nagkitâ ak han ak DVD nga Lupin III:The Castle of Cagliostro. Maupay hin duro an salida: kalaksi an dalagan han istorya ngan maupay an kadirek ni Hayao Miyazaki.

Pero diri ini amo an syahan ko nga pakabati kan Lupin III. An gisayohi nga ak pakabati mahitungod kan Lupin III dida hin videogame ha Nintendo nga ginpagawas han Namco. An ngaran hini amo an Lupin III:Pandora no Isan (kasurat ha Hinapon hini amo an: ルパン三世 パンドラの遺産 ) . Ini nga videogame ginhimuan hin run-through ha YouTube. Pero waray anay ak makatipara hini kay han syahan ko nga pagmulay hini nga uyag, didto ha Tacloban, baga man hin waray may nakabasa hin Hinapon. Kilalado namon an Pandora no Isan ha ngaran nga "Danger House" (di ak maaram kon diin ini nga ngaran nagtikang). Yana, katapos hin haros mga 18 o 20 ka tuig nakasabot na ak han tinuod nga ngaran hini nga uyag.

¿Hin-o man hi Lupin III?

Sumala han impormasyon nga nakuha ko ha Iningles nga Wikipedia, hi Arsène Lupin III amo an eponimo nga karakter han manga nga sinurat ni Kazuhiko Kato (kilalado gihapon ha ngaran nga Monkey Punch). An manga nga Lupin III (ルパン三世, Rupan Sansei kon ha Hinapon) mahitungod kan Lupin III, usa nga kawatan ngan han iya mga batos. Hi Lupin III amo an apo ni Arsène Lupin, an kawatan nga bayani han mga sinurat nga nobela ni Maurice Leblanc. An iya mga batos amo hira Daisuke Jigen usa nga sharpshooter ngan hi Goemon Ishikawa XIII usa nga samurai nga an katana naka-utod hin bis ano. Talagsa, nagkakasabot o kundi man nagkakaaway hira han sinisiring nga femme fatale nga hi Fujiko Mine. An kabangga ni Lupin III amo hi Inspector Koichi Zenigata, usa nga pulis nga karuyag makadakop kan Lupin. Tungod han kasikat han manga, nagkaada na hin mga pelikula, videogame, mga pasalida ha telebisyon mahitungod kan Lupin III. Para hin dugang nga impormasyon kitaa an lista han mga opisyal nga websayt mahitungod kan Lupin III.

Katapos hin Duha ka Tuig

Yana pa la ak nagkaada hin higayon nga makabalik nganhe katapos hin duha ka tuig. ¡Kaiha hin duro! Nagbutang la ak hini nga paskin agod pagdisiplina hit ak kalugaringon nga paghinumdom hini nga proyekto. Nakulangan ak hin takna nga magmangno hini nga blog tungod han damo ko nga aratupagon. Upod hini amo an:

1. Timahon it paghubad han Interface han Winaray nga Wikipedia.
2. Tikangon it paghubad ngadto ha Winaray han Google Interface.
3. Paghibaro paggamit hiton Yackpack.
4. Iba pa nga mga proyekto nga nahahanungod hit Winaray.

Damo it aratupagon, guti-ay la it panahon.