Pagkita han Phantom

Kagab-i didto ako ha Costa Mesa ha Orange County Performing Artscenter (OCPAC). Nagkita ako han The Phantom of the Opera ni Andrew Lloyd Weber nga ginbase han nobela ni Gaston Leroux nga amo gihapon an titulo (Le Fantôme de l'Opéra ha orihinal nga Franses). Inin pasundayag padayon nga igpapasundayag didto ha Segerstrom Hall tikang han Marso 26 tubtob hit Abril 19 yana nga tuig didto. Para hin dugang nga impormasyon bisitaha it opisyal nga websayt hit OCPAC ha http://www.ocpac.org

Nagkita ak nga daan han 2004 nga salida han hini nga musical ni Andrew Lloyd Weber. An 2004 nga pelikula gindirek ni Joel Schumacher nga diin hi Gerard Butler an nagkapot han papel han Phantom ngan hi Emmy Rossum ngan Patrick Wilson an nagkapot han mga papel ni Christine Daaé ngan Raoul, Vicomte de Chagny. Mayda liwat ak han soundtrack han 2004 nga pelikula, ngan nakabati na ak han original cast nga album. Amo nga karuyag ko kitaon an bersyon ha entablado agod maikompara an duha. An mga pagkakaiba han bersyon ha entablado ngan han bersyon ha pelikula ginpahayag ha Wikipedia nga artikulo mahitungod han bersyon ha pelikula.

¿Ano it ak masisiring? Ha syahan maupay hin duro an pasundayag ngan gin-ganahan ako pagkita han bug-os nga pasundayag. Mayda gudman mga pagkaiba han bersyon ha entablado ngan han bersyon ha pelikula pero amo man ini kay iba man nga paagi hin pagpasundayag iton teatro ngan entablado kaysa hit pelikula ha sine. Pananglitan, nanotisyahan ko nga mayda pagkaiba han mga pulong dida han "Think of Me" nga kanta nga ginkanta ha entablado kaysa han bersyon nga ginkanta ni Emmy Rossum dida han salida. Ngan mayda mga ginkanta ha entablado nga dialogo dida han salida. Pero gabay pa magkita ka hiton bersyon ha entablado ngan hit pelikula agod makahimo ka hit imo kalugaringon nga pagpili.

Mayda la ak gutiayay nga waray makita kay an ak napalit nga lingkoran ha Segerstrom Hall. Bisan man kon harani, sobra ako ngadi ha tuo amo nga mayda bahin han entablado nga nakasalipod han tuo nga bahin han entablado. Ngan mayda mga eksena nga baga hin diri klaro kay tungod han kapuwesto han ak lingkoran.

Ambot la kon an sistema hin pagpatunog (o sound system) an may problema pero mayda mga bahin han kanta ngan dialogo nga talagsa baga hin diri klaro. O bangin la tikabungol na ak. Pero mayda mga bahin han kanta ngan dialogo nga talagsa diri klaro. Pero an dako nga bahin han pasundayag klaro hin duro an kanta ngan dialogo, amo nga OK la inin mga gagmay nga mga sayop.

Ha halipot nga sumat, maupay hin duro an pasundayag bisan man kon mayda mga gudti-gudti nga angay balhinon. Kon makakadto ka ha Costa Mesa tikang yana tubtob hit Abril 19, maupay kon magkita ka hit The Phantom of the Opera ni Andrew Lloyd Weber.